BELAGAVI NEWS :

ಶ್ವೇತಭವನದಲ್ಲಿ ನಡೆದ ಉನ್ನತ ಮಟ್ಟದ ಸಭೆಯಲ್ಲಿ ಮಾತನಾಡಿದ ಟ್ರಂಪ್, ವೆನೆಜುವೆಲಾದ ತೈಲ ಉದ್ಯಮ ಪುನಶ್ಚೇತನಕ್ಕಾಗಿ ಕನಿಷ್ಠ 100 ಬಿಲಿಯನ್ ಡಾಲರ್ (9 ಲಕ್ಷ ಕೋಟಿ ರೂ.) ಹೂಡಿಕೆ ಮಾಡುವಂತೆ ಕೇಳಿಕೊಂಡರು. ಇದರಿಂದ ಅಮೆರಿಕಕ್ಕೆ ಕಡಿಮೆ ದರದಲ್ಲಿ ಇಂಧನ ಲಭ್ಯವಾಗಲಿದೆ ಎಂಬುದು ಅವರ ಲೆಕ್ಕಾಚಾರವಾಗಿದೆ.


ಸಭೆಯಲ್ಲಿ ಭಾಗವಹಿಸಿದ್ದ ಎಕ್ಸಾನ್ ಮೊಬಿಲ್ ಮುಖ್ಯಸ್ಥ ಡ್ಯಾರೆನ್ ವುಡ್ಸ್ ಅವರು ಟ್ರಂಪ್ ಉತ್ಸಾಹಕ್ಕೆ ತಣ್ಣೀರೆರಚಿದ್ದಾರೆ. "ನಾವು ಈಗಾಗಲೇ ಎರಡು ಬಾರಿ ವೆನೆಜುವೆಲಾದಲ್ಲಿ ನಮ್ಮ ಆಸ್ತಿಯನ್ನು ಕಳೆದುಕೊಂಡಿದ್ದೇವೆ (ಮುಟ್ಟುಗೋಲು ಹಾಕಿಕೊಳ್ಳಲಾಗಿದೆ). ಈಗ ಮೂರನೇ ಬಾರಿ ಅಲ್ಲಿ ಪ್ರವೇಶಿಸಬೇಕಾದರೆ ಪರಿಸ್ಥಿತಿಯಲ್ಲಿ ಭಾರಿ ಬದಲಾವಣೆಯಾಗಬೇಕಿದೆ. ಸದ್ಯದ ಮಟ್ಟಿಗೆ ವೆನೆಜುವೆಲಾ ಹೂಡಿಕೆಗೆ ಯೋಗ್ಯವಾಗಿಲ್ಲ," ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.


ಇದೇ ವೇಳೆ, ವೆನೆಜುವೆಲಾದಲ್ಲಿ ಮಡುರೊ ಬಂಧನದ ನಂತರ, ಹಂಗಾಮಿ ಆಡಳಿತದೊಂದಿಗೆ ಅಮೆರಿಕ ಸಂಪರ್ಕದಲ್ಲಿದೆ. ಕಂಪನಿಗಳಿಗೆ ಅಭಯ ನೀಡಿರುವ ಟ್ರಂಪ್‌, "ವೆನೆಜುವೆಲಾದಲ್ಲಿ ಯಾವ ಕಂಪನಿಗಳು ಕಾರ್ಯಾಚರಣೆ ನಡೆಸಬೇಕು ಎಂಬುದನ್ನು ಅಮೆರಿಕ ನಿರ್ಧರಿಸುತ್ತದೆ. ನೀವು ನೇರವಾಗಿ ನಮ್ಮೊಂದಿಗೆ ವ್ಯವಹರಿಸುತ್ತೀರಾ ಹೊರತು ವೆನೆಜುವೆಲಾ ಜೊತೆಗಲ್ಲ. ತೈಲ ಮಾರಾಟದ ಹಣವೂ ಅಮೆರಿಕ ನಿಯಂತ್ರಿತ ಖಾತೆಗಳಿಗೆ ಬರುತ್ತದೆ," ಎಂದು ಹೇಳಿದ್ದಾರೆ.


ವೆನೆಜುವೆಲಾದಲ್ಲಿ ಕಾರ್ಯಾಚರಣೆ ನಡೆಸುತ್ತಿರುವ ಏಕೈಕ ಪ್ರಮುಖ ಅಮೆರಿಕನ್ ಕಂಪನಿಯಾದ ಶೆವ್ರಾನ್ ತನ್ನ ಉತ್ಪಾದನೆಯನ್ನು ಹೆಚ್ಚಿಸುವ ಭರವಸೆ ನೀಡಿದೆ. ಸ್ಪೇನ್‌ನ ರೆಪ್ಸೋಲ್ ಕಂಪನಿ ಕೂಡ ಸೂಕ್ತ ವಾತಾವರಣವಿದ್ದರೆ ಮುಂದಿನ ಕೆಲವು ವರ್ಷಗಳಲ್ಲಿ ಉತ್ಪಾದನೆಯನ್ನು ಮೂರು ಪಟ್ಟು ಹೆಚ್ಚಿಸುವುದಾಗಿ ಹೇಳಿದೆ. ಸಣ್ಣ ಕಂಪನಿಗಳು ಇದೊಂದು ಸುವರ್ಣಾವಕಾಶ ಎಂದು ಬಣ್ಣಿಸಿವೆ. ಆದರೆ, ದೊಡ್ಡ ಕಂಪನಿಗಳು ಹೂಡಿಕೆಗೆ ಹಿಂದೇಟು ಹಾಕುತ್ತಿವೆ.

ಡೊನಾಲ್ಡ್‌ ಟ್ರಂಪ್ ಹೇಳಿದಂತೆ 100 ಬಿಲಿಯನ್ ಡಾಲರ್ ಹೂಡಿಕೆ ಹರಿದು ಬರುವುದು ಕಷ್ಟಸಾಧ್ಯ. ರಾಜಕೀಯ ಸ್ಥಿರತೆ, ಕಾಯಂ ಭದ್ರತೆ ಮತ್ತು ಕಾನೂನಿನ ರಕ್ಷಣೆ ಇಲ್ಲದೆ ಎಕ್ಸಾನ್ ಅಥವಾ ಶೆಲ್‌ನಂತಹ ದೊಡ್ಡ ಕಂಪನಿಗಳು ಬಿಲಿಯನ್‌ಗಟ್ಟಲೆ ಹಣ ಹೂಡಿಕೆ ಮಾಡುವುದಿಲ್ಲ. ಸಣ್ಣ ಪುಟ್ಟ ಹೂಡಿಕೆಗಳು ಬರಬಹುದಾದರೂ, ಅದರಿಂದ ಜಾಗತಿಕ ತೈಲ ಬೆಲೆಯ ಮೇಲೆ ತಕ್ಷಣಕ್ಕೆ ಯಾವುದೇ ಪರಿಣಾಮ ಬೀರುವುದಿಲ್ಲ ಎಂದು ಇಂಧನ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಇನ್ನಷ್ಟು ಓದಿರಿ:

ʻಕಿಚ್ಚನ ಚಪ್ಪಾಳೆʼ ನಿರ್ಧಾರಕ್ಕೆ ಗಿಲ್ಲಿ ಫ್ಯಾನ್ಸ್ ಬೇಸರ ; ಫಿನಾಲೆಯಲ್ಲಿ ಟ್ವಿಸ್ಟ್ ಇದೆಯಾ?