BELAGAVI NEWS :

ಅಮೆರಿಕದ ಟ್ರೆಷರಿ ಇಲಾಖೆ ಬಿಡುಗಡೆ ಮಾಡಿರುವ ಅಂಕಿ-ಅಂಶಗಳ ಪ್ರಕಾರ, 2025ರ ಅಕ್ಟೋಬರ್ ಅಂತ್ಯದ ವೇಳೆಗೆ ಭಾರತವು ಹೊಂದಿದ್ದ ಅಮೆರಿಕನ್ ಬಾಂಡ್ ಮೌಲ್ಯ 190 ಬಿಲಿಯನ್ ಡಾಲರ್‌ಗೆ ಇಳಿಕೆಯಾಗಿದೆ. ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಇದು ಬರೋಬ್ಬರಿ 50.7 ಬಿಲಿಯನ್ ಡಾಲರ್‌ನಷ್ಟು ಕಡಿಮೆಯಾಗಿದೆ.
ಒಂದು ಕಡೆ ಬಾಂಡ್ ಮಾರಾಟ ಮಾಡಿದ್ದರೆ, ಮತ್ತೊಂದು ಕಡೆ ಆರ್‌ಬಿಐ ಚಿನ್ನದ ಸಂಗ್ರಹವನ್ನು ಭರ್ಜರಿಯಾಗಿ ಹೆಚ್ಚಿಸಿಕೊಂಡಿದೆ. ಆರ್‌ಬಿಐ ದತ್ತಾಂಶದ ಪ್ರಕಾರ, ಕಳೆದ ವರ್ಷ 866.8 ಮೆಟ್ರಿಕ್ ಟನ್ ಇದ್ದ ಚಿನ್ನದ ಸಂಗ್ರಹವು, 2025ರ ಅಕ್ಟೋಬರ್ ಅಂತ್ಯದ ವೇಳೆಗೆ 880.18 ಮೆಟ್ರಿಕ್ ಟನ್‌ಗೆ ಏರಿಕೆಯಾಗಿದೆ.
ಭಾರತದ ಒಟ್ಟಾರೆ ವಿದೇಶಿ ವಿನಿಮಯ ಮೀಸಲು ಸುಮಾರು 685 ಬಿಲಿಯನ್ ಡಾಲರ್ ಮಟ್ಟದಲ್ಲಿ ಸ್ಥಿರವಾಗಿದೆ. ಆದರೆ, ಈ ಮೀಸಲು ನಿಧಿಯ ಸ್ವರೂಪ ಬದಲಾಗಿದೆ. ಸೆಪ್ಟೆಂಬರ್ 26ರ ಲೆಕ್ಕಾಚಾರದಂತೆ, ಒಟ್ಟು ಮೀಸಲು ನಿಧಿಯಲ್ಲಿ ಚಿನ್ನದ ಪಾಲು ಶೇ. 13.6ಕ್ಕೆ ಏರಿಕೆಯಾಗಿದೆ. ಕಳೆದ ವರ್ಷ ಇದೇ ಅವಧಿಯಲ್ಲಿ ಒಟ್ಟು ಮೀಸಲು ನಿಧಿಯಲ್ಲಿ ಚಿನ್ನದ ಪಾಲು ಕೇವಲ ಶೇ. 9.3ರಷ್ಟಿತ್ತು ಎಂಬುದು ಗಮನಾರ್ಹ.
ಭಾರತವು ಅಮೆರಿಕದ ಬಾಂಡ್ ಮೇಲಿನ ಹೂಡಿಕೆ ತಗ್ಗಿಸಿರುವುದು ಆರ್‌ಬಿಐನ 'ವೈವಿಧ್ಯೀಕರಣ' ತಂತ್ರದ ಭಾಗವಾಗಿದೆ. ಮುಂದುವರಿದ ದೇಶಗಳಲ್ಲಿ ವಿತ್ತೀಯ ಒತ್ತಡ ಹೆಚ್ಚಾಗುತ್ತಿದ್ದು, ಇದರಿಂದ ಜಾಗತಿಕ ಬಾಂಡ್ ಇಳುವರಿ ಏರಿಕೆಯಾಗುತ್ತಿದೆ. ಇದು ಹೂಡಿಕೆಯ ಮೌಲ್ಯದ ನಷ್ಟಕ್ಕೆ ಕಾರಣವಾಗಬಹುದು. ಈ ಅಪಾಯವನ್ನು ತಗ್ಗಿಸಲು ಆರ್‌ಬಿಐ ಮತ್ತು ಇತರೆ ಕೇಂದ್ರ ಬ್ಯಾಂಕುಗಳು ಬಾಂಡ್ ಬಿಟ್ಟು ಚಿನ್ನದತ್ತ ಮುಖ ಮಾಡುತ್ತಿವೆ," ಎಂದು ಐಡಿಎಫ್‌ಸಿ ಫಸ್ಟ್ ಬ್ಯಾಂಕ್‌ನ ಮುಖ್ಯ ಅರ್ಥಶಾಸ್ತ್ರಜ್ಞೆ ಗೌರಾ ಸೇನ್‌ಗುಪ್ತ ಹೇಳಿದ್ದಾರೆ.ಭಾರತ ಮಾತ್ರವಲ್ಲದೆ ಚೀನಾ, ಬ್ರೆಜಿಲ್, ಹಾಂಕಾಂಗ್ ಮತ್ತು ಸೌದಿ ಅರೇಬಿಯಾ ದೇಶಗಳು ಕೂಡ ಅಮೆರಿಕದ ಬಾಂಡ್ ಮೇಲಿನ ಹೂಡಿಕೆಯನ್ನು ವರ್ಷದಿಂದ ವರ್ಷಕ್ಕೆ ಕಡಿಮೆ ಮಾಡಿವೆ.
ಇದೇ ಸಮಯದಲ್ಲಿ ಯುನೈಟೆಡ್ ಕಿಂಗ್‌ಡಮ್ (ಯುಕೆ), ಬೆಲ್ಜಿಯಂ, ಜಪಾನ್, ಫ್ರಾನ್ಸ್, ಕೆನಡಾ ಮತ್ತು ಯುಎಇ ದೇಶಗಳು ಅಮೆರಿಕದ ಟ್ರೆಷರಿ ಬಾಂಡ್ ಮೇಲಿನ ಹೂಡಿಕೆಯನ್ನು ಹೆಚ್ಚಿಸಿಕೊಂಡಿವೆ. ಸದ್ಯ ಅಮೆರಿಕದ ಬಾಂಡ್ ಮಾರುಕಟ್ಟೆಯಲ್ಲಿ ಜಪಾನ್ ಅತಿ ಹೆಚ್ಚು ಹೂಡಿಕೆ (1.2 ಟ್ರಿಲಿಯನ್ ಡಾಲರ್) ಹೊಂದಿರುವ ದೇಶವಾಗಿದೆ. ಜಾಗತಿಕವಾಗಿ ಕೇಂದ್ರ ಬ್ಯಾಂಕುಗಳು ಒಟ್ಟು 9.24 ಟ್ರಿಲಿಯನ್ ಡಾಲರ್ ಹಣವನ್ನು ಅಮೆರಿಕದ ಟ್ರೆಷರಿ ಬಿಲ್‌ಗಳಲ್ಲಿ ಹೂಡಿಕೆ ಮಾಡಿವೆ.

ಇನ್ನಷ್ಟು ಓದಿರಿ:

ಆಪರೇಷನ್ ಸಿಂಧೂರ ಬಳಿಕ ಪಾಕಿಸ್ತಾನ ಸಂವಿಧಾನ ಬದಲಾವಣೆ : ಅನಿಲ್ ಚೌಹಾಣ್